POLÍGONO INDUSTRIAL DE SETE PÍAS

 O Polígono de Sete Pías é a gran aposta do goberno municipal en materia industrial e de creación de emprego. As 72 empresas instaladas xeneran arredor de 700 postos de traballo, unha cifra que se poderá duplicar cando a Xunta aprobe o proxecto do Concello para ampliar a superficie noutros 200.000 metros cadrados.

A área de Sete Pías está dotada dos medios máis vangardistas en novas tecnoloxías e dunha urbanización ben deseñada que impulsa a implantación empresarial. O Concello vén de xestrionar a instalación das telecomunicacións sen fíos de acceso a internet de banda ancha.

Da superficie total de 285.068 metros cadrados do polígono, 193.147 metros destinanse a parcelas de uso industrial e outros 36.479 metros a zonas verdes. As 100 parcelas industriais contan cunha superficie media de 30 por 60 metros (1.800 metros cadrados).

O parque de Sete Pías conta cun vial principal de 20 metros que é o eixo estruturador do polígono, e doutros secundarios, de 16 metros, que percorren o ámbito perimetral –en forma de anel- adaptándose á topografía para que as pendentes dos viais sexan axeitadas.

O Polígono de Sete Pías converteuse no gran dinamizador económico da construcción en Cambados, ó xerar un elevado volume de investimentos na implantación de 72 naves industriais no recinto. Gran parte das industrias instaladas corresponden ós sectores da conserva e da cocción-depuración de mariscos. Pero tamén se edificaron naves pertencentes ó sector do automóbil, dos transportes, artes gráficas, mecanizados metálicos, canteiría, suministros agrícolas, lavado e engraxe, construcción, textil, audiovisual, etc.

Unha vez consumada a fusión co polígono de Cabanelas, surxiu a gran área do Salnés onde empresarios e traballadores contan cun edificio de usos múltiples para que poidan dispoñer de servicio médico, mútua de  seguros e gardería infantil. En total, o polígono industrial do Salnés abranxe 610.000 metros cadrados e cento vintecinco empresas que darán emprego a 2.000 persoas.