SAÚDO DO ALCALDE

O 30 de abril de 2009 tiven a honra de sustituir na Alcaldía a José Manuel Cores Tourís, tralo seu merecido nomeamento como delegado territorial da Xunta en Pontevedra. Asumo esta gran responsabilidade coa ilusión do que inicia unha nova e esperanzadora etapa, e coa vocación de traballo de quen aspira a continuar o  gran labor dos seus antecesores: Antonio Pillado, Santiago Tirado e José M. Cores Tourís, ata situar a Cambados nas maiores cotas de modernidade e prosperidade da súa historia.

Un municipio de interese turístico, como é o noso, precisa estar presente en Internet pola súa indiscutible capacidade para mellorar a interrelación entre os pobos e nacións do mundo actual. Os cambadeses merecen acceder coa máxima facilidade á súa administración máis próxima para coñecer de primeira man a actividade que desenvolvemos no Concello. Os usuarios da rede de redes tamén dispoñen dunha ferramenta esencial para coñecernos mellor sen saír dos seus fogares.

Debemos procurar que esta páxina aberta, que xa vai cumprir unha década, siga sendo útil no ámbito local e sirva como atraínte tarxeta de presentación para todas as persoas que queiran descubrir de preto as nosas excelencias como destino turístico, un destino ideal para os que aman o patrimonio histórico e a beleza das paraxes naturais. Esta web ofrece unha panorámica dos atractivos que adornan o noso municipio, visita obrigada para os viaxeiros que elixen Galicia para descansar ou revitalizarse.

O visitante poderá comprobar que Cambados é un museo de arte ó aire libre, polo seu monumental Conxunto Histórico, un dos máis fermosos de Galicia, situado no centro neurálxico do Val do Salnés e na beira da ría de Arousa. A decana Festa do Albariño, declarada de interese turístico nacional, xunto co patrimonio artístico que inclúe a praza de Fefiñáns, as románticas ruínas de Santa Mariña, o paseo da Calzada ou a torre de San Sadurniño, son os símbolos máis recoñecidos dentro e fora do noso país.

Ademais deste inesquecible percorrido cultural e artístico, gustaríame convidalos a coñecer a faciana máis íntima de Cambados, ese aspecto que tanto gabou o noso poeta Ramón Cabanillas. Veñan a visitar este municipio aberto ó mar e ó agro, camiñen polas súas prazas, as súas rúas e parroquias, coñezan a súa xente tan emprendedora e sensible como hospitalaria e soñadora.

  Un saúdo cordial, Luis Aragunde Aragunde