INFORMACIÓN TURÍSTICA DE CAMBADOS.

O Concello de Cambados fomenta o turismo cultural e de calidade reforzado polo legado histórico da Vila, declarada Conxunto Histórico-Artístico e Ben de Interese Cultural en Novembro do 2001, que é o máximo galardón outorgado pola Administración Autonómica en protección de conxuntos históricos e zonas monumentais.

En Cambados destacan as rutas monumentais, a Ruta do Viño, a rede de museos formada por cinco edificios nobles: Museo Etnográfico e do Viño, Museo do Muíño da Seca, Casa museo do “Poeta da Raza” Ramón Cabanillas, Casa do Pescador e o Centro de Interpretación das Rutas do Viño. Completan a oferta turística as rutas ecolóxicas e de sendeirismo, a gastronomía da vila e a proxección do turismo náutico. Ademais, a histórica Festa do Albariño, á que cada primeira semana de agosto acoden miles de visitantes para honrar o “príncipe dourado dos viños”, fai de Cambados o lugar ideal para desfrutar dunha amplia oferta de recursos turísticos.

ESTIMACIÓN DE VISITANTES:
A estimación aproximada ascende a máis de 600.000 visitantes. Esta avaliación é anual e a maior parte dos rexistros acádanse na etapa estival coincidindo cos principias eventos do verán. A afamada festa do Albariño  congrega cada verán arredor de 200.000 persoas, mentres que a Festa Europea do Viño e a Exaltación da Vieira, aínda sendo festexos novos, atraen a gran cantidade de visitantes e turistas para degustar os caldos de diferentes rexións europeas e os aprezados mariscos da ría.


PROCEDENCIA DOS VISITANTES:
Os visitantes son nun 90 por cento de procedencia nacional, salientando os de Madrid e os das comunidades limítrofes como Asturias, Castela-León, xunto co País Vasco, os que máis nos visitan. Tamén cómpre referirse ós visitantes da nosa propia comunidade, moi dados a excursións de unha xornada ó longo de todo o ano. En canto ós estranxeiros Portugal, Francia, Alemaña, Inglaterra e o “turismo de raíces” como Arxentina, Venezuela ou Uruguai son os que máis visitantes achegan á nosa Vila.

ESTACIONALIDADE DO TURISMO:
A tempada de maior número de visitantes é a de xullo, agosto e setembro, e a partires desas datas mingua de maneira paulatina ata os meses de decembro, xaneiro e febreiro, que son os de menor afluencia turística. Cómpre resaltar a evolución dos últimos anos nos que se pasou de centralizar as vacacións nun só mes, a poder distribuilas ó longo do ano. Tamén cómpre suliñar que as diferentes “pontes” e mailo turismo da terceira idade alongan a tempada de maneira sustancial, e axudan a paliar a estacionalidade da nosa rexión.

ACCIÓNS DE CAPTACIÓN DE TURISTAS:
As accións que se levan a cabo para a captación de turistas e visitantes céntranse en promocións e presentacións ó longo do ano, de ámbito nacional e internacional sobre Cambados Ben de Interese Cultural, Cambados Capital do Albariño, Cambados Gastronómico e Festivo, e Cambados Estación Náutica.

   
 
Realízanse publicacións en revistas e xornais, edítanse máis de 500.000 exemplares de cartelería e material pormocional en xeral, destinado a cubrir estos eventos e as necesidades da Oficina de Turismo e Museos.

O Concello de Cambados asiste ó circuito nacional e internacional de feiras turísticas onde participa a través de Turgalicia e do PDT do Salnés visitando os certamen da BTL en Lisboa, FITUR en Madrid, ITB de Berlín, WTM de Londres, Expovaciones de Bilbao, SICT e Salón Náutico de Barcelona e INTUR  en Valladolid. Nestes certames foméntanse as reunións de familiarización con profesionais e coa prensa especializada no turismo cultural, workshops e presentacións.

Ó longo do ano o Concello de Cambados participa en numerosas iniciativas para grabacións e documentais televisivos como os realizados para o canal Viajar, TVE “En ruta con la guía” ou para TV-4 de Castilla e León potenciando así a nosa imaxe de destino turístico de calidade.  Estes programas, ademais de emitirse nos canais analóxicos e dixitais, tamén se transmiten cara o canal internacional.

A oferta turística do Concello de Cambados baséase no ámbito cultural, gastronómico e festivo, náutico, paisaxístico, e como oferta complementaria presenta unha ampla e variada hostalería composta por casas de turismo rural, Parador Nacional de Turismo, hoteis familiares e unha restauración onde a excelencia da materia prima conxúgase perfectamente co bo facer dos restauradores cambadeses. Isto permítenos recibir visitantes ó longo de todo o ano e non reducir as nosas expectativas á época estival, na que Cambados é o complemento ideal nunha comarca moi enfocada cara o turismo de sol e praia.