OBRADOIRO DE EMPREGO “AS TELLEIRAS”

O Obradoiro de Emprego “As Telleiras”, promovido polo Concello de Cambados, subvencionado pola Consellería de Traballo e cofinanciado polo Fondo Social Europeo, é un programa de formación e emprego que consta de catro especialidades: albanelería, cantería, carpintería e xardinería-medio ambiente. En cada módulo hai dez alumnos vinculados a través dun contrato de formación.

A duración deste obradoiro é de un ano (dende o 01/07/08 ata o 30/06/09), tempo no que o alumnado-traballador recibe formación teórico práctica en alternancia co traballo, levando a cabo actividades de utilidade pública e interese social ó mesmo tempo que adquiren experiencia laboral.

Dos corenta alumnos-traballadores, un 80 % son mulleres e a media de idade está nos 38 anos. Aparte da formación profesional ocupacional do seu módulo, todos participan das seguintes actividades complementarias:
-    Igualdade de xénero.
-    Sensibilización medioambiental.
-    Iniciación á informática.
-    Formación e orientación laboral.
-    Prevención de riscos laborais.

As persoas que non posúen os estudos básicos (un 15 % do alumnado), participan ademais nas clases preparatorias para a obtención do título de graduado en ESO.

Entre as actuación que se están desenvolvendo atópanse as seguintes:
-    Acondicionamento das telleiras do Facho.
-    Recuperación da praia das Saíñas.
-    Mellora da ruta de sendeirismo dende o Monte da Pastora ata a ribeira do Umia.
-    Remodelación de distintos lavadoiros.
-    Creación dunha área recreativa en Covas de Lobos.
-    Proxecto cidade verde II.

Obxetivo:
•    Mellorar as posibilidades de ocupación deste colectivo, especialmente daqueles grupos con especiais dificultades de inserción laboral.
•    Realizar accións de formación en alternancia coa práctica profesional prestando especial atención á incorporación da muller ó mercado laboral.
•    Fomentar e apoiar as iniciativas de autoemprego que se xeren ó longo do desenvolvemento do proxecto.