ESCOLA MUNICIPAL DE MÚSICA DE CAMBADOS

A Escola Municipal de Música de Cambados nace no ano 2002 e ten como principio básico fomentar a formación musical de persoas de tódalas idades segundo conveña, tanto a nivel afeizoado como profesional. O noso plan de estudos baséase en dous obxectivos fundamentais: ofertar unha calidade de ensinanza homologable á das institucións oficiais (Conservatorios de grao elemental e medio) para facilitar o acceso ás mesmas e proveer unha formación xeral musical a niveis afeizoados.
Nesta Escola existe por tanto unha clasificación específica para cada nivel segundo a idade e o desenvolvemento musical.

        
CONSERVATORIO MUNICIPAL DE GRAO ELEMENTAL DE MÚSICA DE CAMBADOS
O Conservatorio Municipal de Música de Cambados foi creado no ano 2004. Ten como obxectivo principal fomentar a formación musical de persoas entre oito e catorce anos, proporcionar ao alumnado unha formación artística de calidade e garantir a cualificación dos futuros profesionais da música, tanto a nivel afeizoado como na iniciación do ámbito musical profesional. As ensinanzas elementais de música deste Conservatorio teñen as características e a organización que as administracións educativas determinan.
Neste Conservatorio de Música existe como, é de rigor, unha clasificación específica para cada nivel segundo a idade e o desenvolvemento musical.  Así, os alumnos/as  reciben clases de Linguaxe Musical, Educación Auditiva e Vogal e instrumento individual e colectivo, a partir dos oito anos.
      

As especialidades que se ofertan tanto na Escola como no Conservatorio son: Percusión, Piano, Acordeón, Guitarra, Violín, Violonchelo, Frauta traveseira, Óboe, Clarinete, Saxofón, Trompeta, Trombón, Trompa, Tuba/Bombardino e Linguaxe Musical.
Son exclusivas da Escola de Música: Contrabaixo, Baixo eléctrico, Armonía e Análise, Combo Jazz, Coro, Música e Movemento (para alumnos de catro a sete anos; asignatura que permite a asimilación a través do xogo das ferramentas básicas para un ensino musical eficaz en anos posteriores).
O Auditorio de “A Xuventude” e a actual sede dos dous centros, que na actualidade contan con vinte e un docentes para cada unha das especialidades que se imparten. O número total de alumnos entre Escola e Conservatorio é de máis de 200 alumnos aproximadamente cada curso. Como institucións difusoras da música, tanto o Conservatorio como a Escola de música mucicipais do Concello de Cambados, traballan de cotío para que o estudo musical sexa accesíbel a todos os públicos e invítaselles a coñecer as súas instalacións

ORGANIZACIÓN:

A Escola Municipal de Música comeza a súa andaina no ano 2001. Nos dous seguintes cursos escolares, o centro estivo baixo a dirección de D. Marco Lucato, actual docente da mesma,  A partires dese ano e de forma continuada, a Escola e o Conservatorio Municipais de Música están dirixidos por Dª Lorena Varela Guzmán. O ano 2004 foi un ano clave no ámbito musical para o Concello de Cambados, xa caracterizado con anterioridade por unha grande tradición musical, debido a creación e posta en funcionamento do actual Conservatorio de Música.
    A materia de Música e Movemento impártese ademais de no Auditorio, no centro C.P. Antonio Magariños, no Colexio infantil A Pastora, na Casa da Cultura de Castrelo e no C.P. Sto Tomé. Isto aporta unha maior comodidade para os pais dos alumnos de catro a sete anos, xerándose de xeito simultáneo, unha cordial relación entre os diferentes centros educativos do Concello.
    Cada curso escolar está complementado por unha gran cantidade de actividades musicais propostas polos diferentes seminarios do centro.
-    Creación da materia de Banda, actualmente constituída por alumnos da Escola e do Conservatorio.
-    Posta en marcha do Coro Municipal que xa conta cun número elevado de compoñentes.
-    Audicións e concertos de entrada libre celebrados durante todo o curso escolar no Auditorio do centro.
-    Actividades extraescolares coordinadas por docentes nas que se desenvolven diversas facetas artísticas relacionadas coa música (murais, plastilina, banda deseñada, ...)
-    Concertos de Intercambios músico-culturais con outras Escolas de música que fomentan o compañeirismo e  cooperación entre os diferentes músicos de comarcas cercanas.
-    Creación de ciclos de novos valores protagonizados por alumnos do centro e por músicos invitados de todas as especialidades instrumentais e vocais.
-    Celebración de cursos,masterclass e conferencias que abranguen todos os estilos musicais e idades dos alumnos que se presentan.
-    Concertos promovidos polo profesorado, tanto da Escola como do Conservatorio.
-    Excursións.