A Sala de Exposicións do Pazo de Torrado acolle entre o 24 de novembro e o 7 de xaneiro, en horario de 17 a 20 horas de martes  a domingo a exposición “Silencios Naturais”, de Morquecho.  A inauguración terá lugar o sábado 25 ás 20h.

O Salón Peña acollerá o sábado 2 de decembro o festival Albariño Can-Fest, actividade enmarcada dentro da programación de “Cambados Cidade Europea do Viño 2017”, e no que se recadarán fondos para o Refuxio de Animais de Cambados. Este festival contará co seguinte programa:

19:15 Apertura de portas

20:00 – 20:30 Innopiah

20:45 – 21:30 Bergallazo

21:45 – 23:00 Mamá Ladilla

23:15 – 00:15 Konflikto

00:30 – 02:00 Gatillazo

02:15 – 03:30 The Royal Flash

O Centro de Información á Muller da Mancomunidade do Salnés programa unha serie de actividades durante os meses de novembro e decembro, para conmemorar o día internacional contra a violencia de xénero, o 25 de novembro.

Estas actividades inclúen a lectura dun manifesto o vindeiro venres 24, ás 12:00 diante do Concello, á cal convidamos a toda a veciñanza.

Estas serán as actividades programadas:

NOVEMBRO:

-Programa de prevención nos IES: curtas e monólogos contra a violencia de xénero na aula

-Contos para tod@s: sesión dirixidas a centros de educación infantil contra os estereotipos de xénero a través dos contos

-Lectura do manifesto mancomunado contra a violencia de xénero: venres 24 de novembro ás 12:00h nos edificios consistoriais de Cambados, Meis e Ribadumia

DECEMBRO:

-Programa de prevención nos IES: curtas e monólogos contra a violencia de xénero na aula

-Contos para tod@s: sesión dirixidas a centros de educación infantil contra os estereotipos de xénero a través dos contos

-VI Simposio Móstrate Salnés: Simposio que motiva e mostra a outras mulleres as experiencias de emprendemento a nivel comarcal, autonómico, nacional e internacional (Ribadumia)

-II Fast Dates Mulleres do Salnés: Reunións rápidas entre mulleres do Salnés en activo ou inactivo para a busca de traballo ou colaboracións femininas en materia de emprendemento (Meis)

-A unión da o poder: o asociacionismo e a muller: Reunión de asociación con nome feminino a nivel comarcal, internacional e nacional para amosar os beneficios do asociacionismo entre mulleres (Cambados)

Mañá mércores, 22 de novembro, terá lugar no Auditorio Municipal da Xuventude a presentación do libro “Breve historia de Cambados”,de Jacobo Domínguez Pedreira. O acto contará coa participación da presidenta da Deputación, Carmela Silva, e do deputado de Cultura e Lingua Xosé Leal.

 

Todos aqueles que teñan dúbidas sobre a súa factura eléctrica ou queiran saber as claves para aforrar nos consumos e coñecer cómo optar ao novo Bono Social teñen unha importante cita de asesoramento.
Será o vindeiro xoves 23 en Exposalnés, en Cambados, ás 20.30 horas.

Un encontro no que se abordarán temas como os que a cotío chegan á oficina de consumo de Cambados, tal como explicaban o concelleiro de Economía e Facenda, Xurxo Charlín, o traballador municipal encargado da OMIC, e a técnica de Consumo Ana Cores.

O 17 de decembro de 1999 a Asemblea Xeral das Nacións Unidas declarou o 25 de novembro como Día Internacional da Eliminación da Violencia contra as Mulleres, convidando a gobernos, organizacións internacionais e organizacións non gobernamentais a desenvolver actividades dirixidas a sensibilizar á poboación respecto da situación de violencia na que viven moitas mulleres.

A violencia machista é a expresión máis extrema das desigualdades sociais que viven as mulleres. Un tipo de violencia que sofren as mulleres polo simple feito de o seren, unha desigualdade silenciada, agochada e en moitos casos normalizada. Segundo os datos da última Macroenquisa de violencia contra as mulleres realizada no 2015 polo Ministerio de Sanidade, Servizos Socias e Igualdade, un 13% das mulleres residentes en España de máis de 16 anos declaran ter sufrido violencia física ou sexual nalgún momento da súa vida por parte da parella ou exparella, un 26% violencia psicolóxica de control —celos, control de horarios e actividades etc.— e un 20% violencia psicolóxica emocional —insultos, intimidacións, ameazas verbais, etc—. Dende 2003 ata maio do 2017, a Delegación de Goberno rexistrou 53 asasinatos machistas en Galicia, e 780 en España.

Co obxectivo de promover e facer visible o rexeitamento da cidadanía ante calquera tipo de violencia contra as mulleres, no 2015, o Concello de Santiago puxo en andamento a campaña de sensibilización Compostela, en Negro, na que se implicaron arredor de 300 establecementos comerciais e axentes sociais do municipio, que se converteron en embaixadores da mesma.

A acción consistiu en tinguir de negro a cidade a través dos escaparates, os manequíns, a roupa de traballo; vestir loito en sinal de dor por todas as mulleres que sofren violencia machista e como resposta á máis dura das súas consecuencias: a morte.

Partindo desta boa práctica, e coa finalidade de multiplicar e estender a incidencia social desta campaña, no 2016, dezaseis concellos máis uníronse para desenvolveren conxuntamente a campaña de sensibilización En negro, contra as violencias, formaron parte da acción: A Coruña, Ames, Cangas, Carballo, Compostela, Ferrol, Lugo, Poio, Pontevedra, Ribadeo, Sada, Santiago de Compostela, Sarria, Teo, Tui, Vilalba e Zas. Este ano xa somos máis de cincuenta os concellos que queremos situar na axenda política, con contundencia e para sempre, a loita contra as violencias machistas.

Á marxe da repercusión e impacto que poida ter esta campaña, consideramos xa de antemán como un gran éxito compartido o feito de que, por primeira vez, concellos tan diversos, e de diferentes cores políticas, esteamos a traballar en rede contra as violencias machistas e a prol da igualdade das mulleres. Todas e todos en negro, contra a violencia.

 

Esta tarde, a partires das 20:00 h na sala de exposicións de Exposalnés, inaugúrase a exposición de Lino Silva "de paisaxes, rúas e bares", que poderá ser visitada ata o 21 de xaneiro

O domingo 26 de novembro, o auditorio municipal da Xuventude acollerá un encontro de corais, con motivo do XIX aniversario da Coral Polifónica de Santa Mariña.

Este encontró será ás 19:00 e contará coa participación da agrupación músico-vocal “alegre intermezzo”, o grupo Cremallera e a Coral Polifónica de Santa Mariña.

En virtude do acordo de colaboración entre o Club Juventud Cambados e o Real Club Celta de Vigo, ambas entidades seguen organizando diversas actividades de xeito conxunto. A vindeira de elas terá lugar o vindeiro mércoles no auditorio de Cambados, dirixida a pais e nenos do noso fútbol base.
A actividade consistirá nunha charla que impartirá Federico Mallo Ferrer, Catedrático de fisioloxía e endocrinoloxía na Universidade de Vigo e nutricionista do primeiro equipo do Real Club Celta así como das súas categorías base. A temática da charla xirará entorno á importancia da nutrición no deporte base.
A charla comenzará 18:00 e a entrada é gratuita (ata completar aforo) polo que, desde o Club Juventud Cambados animan a todo o mundo a que asista a esta interesante ponencia.
 
 

A asociación de comerciantes Cambados Zona Centro e o Concello organizan a terceira edición do Desfile de Moda. A cita terá lugar o vindeiro domingo 19 de novembro as 18:00 horas no Salón de Exposicións José Peña. O acto de presentación contou coa participación do presidente da Asociación, Juan Rey, o Concelleiro de Economía, Xurxo Charlín, xunto co responsable da empresa organizadora Hugo Andrade.

O evento contará coa participación de 22 establecementos entre tendas de roupa, calzado e deportes, barbarías, unha óptica e unha libraría. Entre o pases haberá dúas demostracións, unha de zumba e outra de artes marciais. Aproveitando este evento instalarase unha mesa informativa da asociación TDAH do Salnés, que tamén ofrecerá talleres para os máis pequenos.

 

 Ir á páxina seguinte Ir á última páxina